شاهد عيان يروي تفاصيل ما حدث في "مطار مشهد" بين السيدة العراقية و ضابط الأمن !!



‘‘بانيقيا نيوز’’
تكليف كامل الزيادي
نشر "تكليف كامل الزيادي" رئيس المجلس المحلي لقضاء المجد محافظه المثنى/ومسؤول مكتب منظمة العمل الإسلامي العراقيه في المثنى، و "شاهد عيانعلى حادثة "مطار مشهد الدولي"، تدوينة على حسابه على فيس بوك أثار ردود فعل متباينة بعد أن كشف فيها التفاصيل الكاملة لما حدث مع السيدة العراقية و ضابط الأمن في مطار مشهد.





وتناقلت مواقع التواصل الاجتماعي مقطع فيديو لمرأة مسنة من محافظة النجف الاشرف تعرضت لإعتداء من قبل ضابط امن في مطار مشهد الدولي، فيما بدت اثار الضرب واضحة على وجهها، فيما أكدت وزارة الخارجية العراقية “متابعتها باهتمام لقضية مواطنة عراقية تعرضت للضرب في مطار مشهد الدولي”. (22/08/2019) 



نص التدوينة


السلام عليكم اصدقائي جميعا،
الساكت عن قول الحق شيطان أخرس،
توضيح،

بسبب تناول تعليقي هذا بصفحات كثيره، وجائتني استفسارات على الخاص بالعشرات، احب ان أوضح لكم ماجرى وامام انظاري انا،


ونحن في صالة المطار في آخر مرحلة تسليم الجنط، وسرا المسافرين يمشي بانسيابيه سقطت شابة خليجيه على الأرض، يقولون يمكن عده صرع عافاه الله وعافاكم من الأمراض،

طبعا احنه العراقيين عدنه حب الفضول، سارعنه لنرى ماحصل الشابه،

شرطة المطار بدورهم ضربوا حزام ورقي حول البنت لمعاينتها وتقديم الاسعافات لها مع وجود نساء معها من ذويها،

قام الضابط بارجاع المسافرين ومن ضمنهم السيده العراقيه التي عرفنا فيما بعد من النجف،

طبعا الحجيه ماقبلت ترجع وقامت بالصياح على الضابط، والله اني كنت اضن ان الواكعه بالأرض هي بنتها، ولذلك معصبه كلش، طبعا اشتد الصياح بين الحجيه والضابط هي دكوله لازم اعبر الحاجز وهو يرطن وياهه بالايراني ماموافق،

طبعا رفعت ايده الحجيه رادت تضربه وبعدين نزلته بس عصبيته فول صايره،. هو هم تنرفز منه، ردت مره ثانيه رفعت ايده وسمطته كف فرت راسه بيه هو ماگال باطل، هم رد عليه ضربه على وجهه، اني والواكفين النوب صحنه لا لا، وركضت عليهم مع انفعال شديد لان هاي مرة جبيره وعراقيه، هو الضابط راسا تراجع للخلف صار ورا جماعته وانسحب، واني وكفت كدام الحجيه لان رادت تلحكه ومتهسترة من شدة العصبيه، كولتله استهدي بالرحمن حجيه، وانتي اشتكي عليه، وبديت اهدي بالوضع واجى رجال جبير اعتقد زوجه كام يتهدد،، كوتله عمي هي ضربته كف، والكاميرات جاي تصور مال المطار وكل شي بالقانون، اقول هذا كلامي امام الله،

اعرف اكو ناس مايعحبهم، بس هذا الحقيقه، الحجيه هي من سببت المشكله لنفسه وللضابط، ولنا لان اكو شباب كامو يصيحون وراد تصير مشكله جبيره بالمطار وهدائنه الوضع،

اخوان البلدان والشعوب لديها قانون تحترمه، ومن يتجاوز على القانون يحاسب، ونحن مرات نحشر انفسنه بالمشاكل،

طبعا لاحضنا البارحه قدوم وفد إيراني من القنصليه لزيارة الحجيه والاعتذار منه وهذا شي جيد، وهم لايحبون ان تسوء العلاقه بين الشعبين، بسبب هذا الحوادث،

اصدقائي يعرفوني الحمدالله والشكر لاعندي ميول لغير دوله ولا أومن بالاصنام السياسيه ولاعندي تاج راس، وعندي اسم العراق فقط هو تاج الراس، ومن يوالي غير العراق وهو عراقي على حساب العراق فحليب امه مو طاهر،

اقول الحق مادمت اعتقده والمايعحبه يسمع الحقيقه هذا مو مشكلتي،
وسلامتكم



‘‘بانيقيا نيوز’’

نشر "تكليف كامل الزيدي" رئيس المجلس المحلي لقضاء المجد محافظه المثنى/ومسؤول مكتب منظمة العمل الإسلامي العراقيه في المثنى، و "شاهد عيان" على حادثة "مطار مشهد الدولي"، تدوينة على حسابه على فيس بوك أثار ردود فعل متباينة بعد أن كشف فيها التفاصيل الكاملة لما حدث مع السيدة العراقية و ضابط الأمن في المطار.